هل الأدب رفاهية ؟
طول عمري و انا بحلم بدخل مالي بدون ما اشتغل يضمنلي حياة كريمة و بيت فيه زوجة جميلة محبة مطيعة وفيَّة متفهمة أحوالي الإبداعية و ولد و بنت مفيش أجمل منهم في الدنيا و ميكونش ورايا حاجة غير العبادة و الكتابة و الحب و كل يوم أصدقاء جدد من اللي قلبي يحبهم . دايما بتخيل يومي في أحلامي بالشكل ده , أصحى قبل صلاة الفجر بساعة و اصحي مراتي ببوسه حنينه تقوم و هي بتبسم في وشي ابتسامة تنور القلب و نروح مع بعض نصحي الولد و البنت و نصلي ركعتين جماعة و اكون حافظ القراءن الكريم كله و بعد ركعتين القيام نلتف في حلقة تعليم القراءن أكون فيها المعلم أشرح أحكام التلاوة و معاني الآيات الكريمة و لما ينادي المؤذن آخد الولد و نروح نصلي الفجر في المسجد و لما نرجع يكون الفطار جهز نفطر كلنا مع بعض و احنا بنتكلم في حاجات كتير مش مهمة و نضحك من قلوبنا بجد وتسألني مراتي عن الطبعة 101 من كتابي الأخير و عن آخر أخبار دار النشر الإنجليزية اللي بترجم كتبي و اللي قررت أفسخ عقدي معاها و اعمل عقد مع دار غيرها أقولها انهم لسه متصلين بيا امبارح و ان صاحب الدار مستر رون قعد يعيط في التليفون و انه صعب عليا جدا و بعدين أخش أوضة المكتب اللي فيها أكبر و أهم مكتبة و اكتب كتابة ملهاش مثيل في التاريخ , كتابة تخلي أعظم الأدباء يسأل يا ترى منين بجيب كتاباتي ؟ كتابة تتحدى كتاب المستقبل بأن يأتوا بمثلها , يتوقف عندها الأدب ماحياً ما قبلها و ما بعدها و لو مفيش كتابة أرمي نفسي في بحر الكتب أصطاد منها اللي محدش يعرف يصطاده , أشوف بعنيه الأفكار أشخاص عايشين معايا , بيتكلموا معايا , بيكلوا معايا , بيستحموا معايا , بيناموا معايا و عند الضهر أروح أصلي في المسجد و يكون الولد و البنت لسه في المدرسة أخلص الصلاة و اروح بعربيتي البي أم أجيبهم من أحسن و أغلى مدرسة لغات في البلد و نرجع البيت نتغدى سوى و بعدين الولاد يخشوا يناموا ساعتين , شوية و المدام تلاغيني و تلمح بلذيذ الرغبات أتوكل على الله سائلا إياه التوفيق و لما اقوم قبل المغرب بساعة أكون مبسوط بريحة المتعة اللي لسه ريشتها بدغدغ جسمي بس ازعل لما افتكر إني فوت صلاة العصر في المسجد (الصلاة الوسطى) لكن معلش أقوم استحمى و اصليه و اعقد مع نفسي اتفاق ( كل يوم ) إني مش هفوتها تاني و اروح أصلي المغرب في المسجد يضحك الشيخ لما يشوفني و يقولي بصوت ممدود : تاني ؟ أقوله ادعيلي يا شيخنا انا عقدت مع نفسي اتفاق يضحك أكتر و يقول بصوته الممدود : تاني ؟ أرجع البيت الاقي المدام بتذاكر للولد و سيبه البنت تطلب مني أذاكرلها الرياضة و بعد ساعة من المناهدة مع البنت أخرج لصلاة العشا و منها على القهوة ألاقي هناك محمد صادق و كامل و محمد سيد أسأل على عمرو موسى ( مش عمرو موسى اياه لأ عمرو موسى غيره ) يقولولي مراته مش راضيه تنزلوا من البيت اتحسر على الرجاله و اقول إنه وحشني أوي من يوم ما اتجوز , كل مرة يدينا معاد و ما يجيش معلش ساعتين بالكتير و كل واحد فينا ...
إيه ده ؟
إيه الهبل اللي انا بنيله ده ؟
يا عم روح ذاكرلك كلمتين انجليزي ينفعوك و انت بتلف على شغل تاني غير وظيفة الحكومة اللي مخلياك مش عارف تفتح عشة حتى مش بيت و لا كمل القصة اللي بدأت تكتبها من شهر فات و مش عارف تخلصها , قال كتابة ملهاش مثيل في التاريخ قال هو التاريخ فاضي لأمثالك
يا عم روح ... طب ... روح ف ستين ... طب...
وله , غور ف داهية ياض
هناك 13 تعليقًا:
طب تصدق انك بتهرج يا محمد
عربية ومفيش شغل ومدارس لغات
ايه يا عم
طب تصور اني عمري ماحلمت بحاجة زي دي
يعني أقصى أحلامي كانت اني اشتغل في مكان محترم وقت معقول ويبقى فيه فلوس بجد ... والنبي يا محمد عمري ما فكرت في حكاية العربية دي
ومالها يا افندي مدارس الحكومة اللي علمتنا ... ما هي زي الفل
وبعدين دار نشر تترجم والطبعة ال101
تصدق بقى انك بتهرج
ست الحسن غادة هانم
و الله العظيم نورتيني يا فندم
إحنا ممكن نعتبر الحلم تهريج مع الواقع ممكن يتلقب جد و بكده يكون التهريج حق مشروع لكل بني حالم
أما بالنسبة للعربية و مدارس اللغات فأعتقد إن 101 طبعة ممكن تجيبهم مش كده ولا إيه ؟
و ادينا بنهرج
قصدي بنحلم
لأ بنهرج
قصدي بنحلم
بنهرج
بنحلم
بنهرج
بنحلم
بنهرج
بنحلم
أي حاجة بقى يا غادة ما انا قلتلك من الأول الاتنين واحد
ابقى اتغطى كويس وانت نايم يا حمادة هههههههههههههههههه
الواقع تصنعة الارادة والتوكل وليس احلام اليقظة
عادل سلامة
:)))))))))))))))
بتحلم .. مش بتهرج على فكرة
و لما تحلم .. احلم براحتك .. افرد نفسك في الحلم اوي و ميهمكش حاجة
ما كفاية ضيق الدنيا علينا
و اد ما تحلم اشحن قوة ... و تفائل خيرا ..
هتلاقي ان شاء الله
:))
تحياتي
أخي العزيز الغالي أوي
أخيراً عبرتني بتعليق , دا انا كنت ناقص أزغرد لما شفته , بس خفت للحاج يقول عليا انهبلت لما يسمعني
أنا و الله العظيم بتغطى كويس لأن الجو بليل فعلا بيبقى برد
و عايز اقولك إن الواقع مش هتصنعه الإرادة و لا التوكل لإنه بالفعل و قع خلاص
كله متسجل في اللوح المحفوظ يا دكتور
آية
مش عارف و الله يا آية احترت
أرد على تعليقك و لا لأ
أصل لو رديت مش هتقريه , لأنك أساساً مش هنا زي ما قلتي
لكن في النهاية لازم أرد
الخوف يا أستاذة آية إن احنا نفضل نحلم و نحلم و نحلم لحد ما نكتشف في آخر المشوار إن كل اللي معانا مجرد حلم و ساعتها هيتحول الحلم لوهم كبير
متشكر أوي على مرورك
حضرتك طب و العمل ؟؟؟
ما هو لا حلم نافع .. و لا واقع بيشبع ...
نعمل ايه طب ؟؟؟
انا اوقات بيتهيألي اني بعيش اصلا في الواقع بالطاقة اللي باخدها م الحلم .. زي الاكل كده تمام ...
على فكرة انا مش مختلفة معاك
اوقات حقيقي بيبقى الحلم وهم كبير .. و مش بس بنكتشف ده في الآخر .. احنا بنبقى عارفين م الاول .. بس بنستعبط
بما اني قريت ردك .. فانا كنت هنا في لحظة ما على فكرة .. بس ده ميمنعش اني في لحظات تانية .. مش هنا
:)
هوا أنا مشكلتي معاك مش في إنك بتهرج، لإ إنك بتتخيل خيالات مضللة لمن هم أمثالك من المبدعين فظيعي الموبهة، وبعيدن اللي مستغرب له (ف حالاتك برضوو) ربطك يومك بالصلاوت الخمس، ده شيء جميــــل ، ربنا يديمها عليـك ....
بس ركز إنك ما قلتش أبقى غني،، والمفروض الولاد يجيبهم السواق، أو باص المدرسة وبعدين إيه الطبعة 101 دي ؟؟؟؟؟
آيه
العمل عمل ربنا يا آيه و الله كتير بسأل نفسي هل لو حققت كل أحلامي هيشفعولي عند ربنا يوم الحساب , يعني مثلا ال 101 طبعه اللي مزعله ( ابراهيم مع نفسه ) ممكن ينفعوني يوميها
ثانياً
أنا مش عارف اني بستعبط , المشكلة إني مصدق نفسي
يا لهوي , مصيبة لكون فعلا مصدق نفسي
ربنا يستر
السيد ابراهيم مع نفسه
يا فندم منور المدونة , ايه الحلاوة دي , ألف لمبة ميت وات , شمس و قمر مع بعض
و الله يا ابراهيم موضوع الفلوس ده مش هو الأساس يعني أنا مش عايز ابقى غني أوي , يعني مستريح ماديا يبقى فضل و نعمة من عنده
ثانياً
أنا لما قلت اجيب الولاد بالعربية مش بالباص , ده كان متهيألي من كتر ما انا نفسي اسوق بي أم دبليو
فأرجوك يا ابراهيم لو عندك واحدة , يا ريت تديني لفه
و يا سيدي متزعلش كده من ال 101 طبعه , مدقش يعني
يا عم محمد الأدب عندنا مش بياكل عيش
خليها هواية احسن
تفضل مبدع على طول
تخليه سبوبة
تلاقى نفسك مضطر تنافق و تداهن و تهبل
علشان تاكل بقلاوة و كنافة و تركب بى ام دبليو و مدراس لغات و فيلا
تعرف انا داميا بحلم بفيلا
مش ع لاشن الفيلا نفسه
علشان البيسن
و الم كل الناس اللى بحبها و نعومفى البسين ( مع انى بغرق فى فدان ميه) و نشوى غزالة و نتكلم بـ (زرافة) و ده طبعا علاشن المدام حتحبسنيى ى صاحبكو كمان ربنا يتوب عليكم من قعدة القهاوى الكحيتى
___________________
يا ولد يا عبده
حضر العصير للبهوات على ما اخد شاور
و متنساش السليزون(معروف طبعا) و الكانبيه( خد بالك لحسن تقراها غلط و تشم ريحة مش اللى هيه) و السيمون فيميه( والله عارفه و كلته)
و ابعتلهم حد يسليهم كده و يعملهم مساج
مساج الخير عليك يا ابو سلامة
صح النوم هو صحيح الواحد من حقه يحلم بس مش للدرجة دي عموما اقفل الشباك كويس لان الجو ج يبرد والظاهر الهوا بأثثر عليك جامد
البوست حلو واتمني ان تحقق احلامك
حسام
و الله يا صاحبي ساعات الأدب بيأكل بقلاوة بس لو أخلصتله
أما بالنسبة لموضوع البيسين فأنا في الحقيقة مش غاويه أوي أنا بفضل الترع عشان كده ناوي إن شاء الله أبني الفيلا بتاعتي على ترعة المريوطية عشان قريبة برضه من البيت القديم
أما بالنسبة للأدوية الكتير اللي انت طلبتها من عبده دي فأنا مش عارف سببها لأني متهيألي إنك و الحمد لله مش عيان و ربنا يديم عليك الصحة و الفول
nudy
يا فندم نورتي مدونتي لدرجة إنك زغللتي عنيه
أوعدك أني هحاول آخد بنصحتك و اقفل الشبابيك كويس
متشكر لتعليقك
السلام عليكم ورحمة الله وبركاته
جميلة أحلامك - أو حلمك ويا رب يرزقك القدرة على تحقيقه :)
حلمك مش كبير على ربنا = المهم تسعى بجد
جميلة التدوينة يا محمد وبتتماس معايا كتيييييير لإن حلمك جزء من حلمي :)
أشوفك سالم
تحياتي
ع.م.ر
أبو عبد الله عمر
يسعدني أن نتشارك نفس الحلم
أحد أهم أسباب الصداقة
الأحلام المشتركة
حقيقي نورت
إرسال تعليق