قل ما تشاءُ , كما تشاءُ , متى تشاءُ , لمن تشاءْ

الثلاثاء، 17 مارس 2009

حوار عادي جداً


س : بتحب مصر ؟

ص : لأ

س : شايف إن فيه بلد تاني أفضل منها ؟

ص : أيوه

س : فين ؟

ص : في أي حته غير مصر

س : لو مصر حاربت إسرائيل , هتحارب مع مصر ؟

ص : أيوه

س : طب ازاي بتكرهها و تحارب في صفها ؟!

ص : لأ , موقفي يرتكز على قاعدة دينية بحتة

س : لكن ربنا أمرنا بحب الوطن

ص : ربنا قال : ألم تكن أرض الله واسعة فتهاجروا فيها

س : بس أرض مصر طيبة

ص : أرض مصر صحرا

س : و النيل ؟

ص : ملوث

س : و ناسها الطيبين الجدعان ؟

ص : ده كلام إعلام حكومي

س : يعني مفيش حاجة عجباك خالص ؟

ص : لأ في

س : إيه ؟

ص : أمل دنقل و نجيب محفوظ

س : طب و إبداع الناس دول جه منين ؟ ما هو من البيئة المصرية

ص : شغلهم حلو , بس انا ما اتمناش اعيش في حارة الناجي , ولا في بيت السيد احمد عبد الجواد , و لا اكون في يوم سبارتكوس المشنوق .

س : أمال عايش فيها ليه لحد دلوقت ؟

ص : عشان معيش حق السفر


هناك 6 تعليقات:

ست الحسن يقول...

متفقة معاك خالص المرة دي
بس بردو بلاش تفارق

http://www.mawaly.com/file/play/37265.html

nudy يقول...

عندك حق يا محمد ابقي شوفلي تذكرة معاك لان مفيش امل في التغيير غير للاسواء وان كنت باحب البلد دي كفاية ان فيها اصدقاء كتير بيبانوا بسوقت الشده

محمد سلامة يقول...

غادة

هو الواحد أساساً عارف يفارق يا غادة
الله أعلم محدش عارف الخير فين

نودي

و ماله يا هند هشوفلك طبعاً
بس خدي بالك , تذكرتك و تذكرتي على حسابك
أتفقنا ؟
أما بالنسبة للأصدقاء , فأه و الله يا هند , هما و الأسرة اللي بيصبروا الواحد على البلد دي

عمرو وجيه يقول...

جميلة أوي بجد

حوار نفسي رائع


انا متفق معاك

بس انا مختلف معاك في حكاية

اني بكرها

بجد انا عشت فترة كبيرة من عمري بره مصر

اكتر ما عشت فى مصر

ولكني اجزم ان مصر هي افضل دلوة عشت فيها


تحياتي لك

أحمد سلامــة يقول...

الصورة دي كانت عندي في بوست عن نفس الموضوع
كان اسمو عادي جدا
من سنتين باين
:)
اه والله
ااااااااااه يا صاحبي
إن الجرح لغائر

محمد سلامة يقول...

عمرو وجيه
أولاً
سعيد جداً جداً بزيارتك و يارب مت تكونش الأخيرة
ثانياً
كلامك فكرني بقصة الملك اللي كان عنده نسر ضخم و بيتكلم زي البني آدمين
طلب منه الملك إنه يطير و يلف العالم كله لحد ما يلاقي أجمل مكان في الأرض و لما رجع النسر و خد الملك على ضهره و نزله أرض جرداء لا زرع فيها و لا ماء
سأله الملك : إزاي يكون ده أجمل مكان في الدنيا
قال النسر : مولاي الملك الأرض دي في عنيا جنة لإنها الأرض اللي اتولدت فيها .
تقريبا القصة دي خدناها في ابتدائي و مكنتش مقتنع و لا مصدق النسر و بعدين فهمت إنهم كانوا بيهيئونا نفسياً لاكتشاف الواقع المرير في المستقبل .


أحمد سلامة
يااااه يا احمد و الله وحشني جداً يا صديقي , أنا بمر كتير عندك بس مش لاقيك
فرحت و الله أول ما شفت تعليقك
الجرح واحد يا احمد و اللي قلته و انت إحساس جيل كامل إلا من رحم ربي ( زي عمرو كده )